التفاصيل



قال الدكتور حاتم الغزال بأن كل التفسيران التي تتحدث عن تراجع شراسة فيروس كورونا مقارنة بشهر مارس اي بداية الوباء ليست منطقية و غير علمية شارحا في التدوينة التي نشرها على حسابه بالفايسبوك اسباب تراجع الوفيات بسبب الفيروس و هذا نص التدوينة:


ثمه جماعة كل نهار يطلعولنا بطلعة هاو قالوا تلقيح السل يحمي من الكورونا، هاو قالوا الكورونا انتشرت في تونس في جانفي و عملنا مناعة القطيع من وقتها، هاو قالوا الفيروس باش يموت في السخانة و كيف ما ماتش هاو ردوه منع مالموته و اما ضعف مالسخانة خاطرو يكثر عليه العرق و يضيق عليه النفس و تنقصلو الشاهية. شو ايجا نقلك حاجة الفيروس راهو ما يعملش ريجيم باش يسمن و يضعف. الفيروس يتغير بطفرات ممكن تصير و ممكن لا و الطفرات هاذي ممكن تخليه اقل او اكثر خطورة. و الشي الاكيد علميا اليوم ان الفيروس ما صارتلوش طفرات تخلي الخطورة متاعو تتغير. الي تشوفوه من تغير في ارقام الوفايات ما عندو حتى علاقة بتغير في خطورة الفيروس و انما أسبابه مختلفة و هي : – كل ما دولة تعمل أكثر تحاليل كل ما تكتشف أكثر حالات بدون أعراض كل ما معدل الوفايات / عدد الحالات المكتشفة ينخفض. و بما ان كل الدول الأوروبية زادت في عدد التحاليل بعد رفع الحجر فالارقام الي تشوفو فيها عادية. – كل ما دولة يكونوا سكانها معدل أعمارهم صغير و عندهم أقل شيوخ و أمراض مزمنة و سمنة كل ما يكون معدل الوفايات أقل و هو ما يفسر انخفاض نسبة الوفايات في العالم بعد انتقال اكبر نسبة من الوباء من أوروبا الى امريكا الجنوبية و الهند. – كل ما تكون المستشفيات تجاوزت إمكانياتها كل ما يزيد عدد الوفايات و هو ما يفسر العدد المنخفض للوفايات في البداية ثم الارتفاع الحاد بعد فترة. – كل ما يضرب الفيروس في المستشفيات و في دور المسنين كل ما يزيد عدد الوفايات و هو ما صار في أوروبا في افريل و ليس السبب ان الفيروس في افريل كان اخطر. ملاحظة 1 : عدد الوفايات في المغرب في ارتفاع متواصل منذ دخول الصيف ليبلغ عدد 25 وفاة يوميا منذ اسبوع. ملاحظة 2 : عدد الوفايات في الجزائر مستقر في معدل 10 وفايات يوميا منذ 4 اشهر و الجزائر ماهيش في القطب الشمالي. ملاحظة عدد 3 : كبار الفشلامة متاع الفايسبوك تكتشفوهم بطريقة واحدة و هي انهم يفكروا في حاجة و وحدهم وحدهم و يقرروا انها صحيحة وحدهم وحدهم و عمرك ما تشوفهم نشروا عمل علمي اتطلعوا عليه و بناو عليه افكارهم و انما افكارهم يصنعوها من الخيال و هوما اصلا في مجال اختصاصهم عمرهم ما نشروا اي عمل علمي خاطر اختصاصهم الوحيد هو التفشليم على الفايسبوك. و السلام

Leave a Comment