علّقت الاعلامية عربية بن حمادي على إيقاف ‘الأنستغراموز’ مريم الدباغ والاحتفاظ بها على اثر تقدمها للسفر في مطار تونس قرطاج، بعد ظهر أمس الأحد…
ونشرت عربية بن حمادي تدوينة للتعليق على التطورات الأخيرة حيث كتبت تقول:
نهارة إلّي قابلتها لأوّل و آخر مرّة في حياتي في برنامج ‘بوليميك’ ما سلّمتش عليها في الكواليس و ما نافقتهاش و ما حسستهاش بالأمان باش بعدها نغدرها في البلاتو لأنّو مش من طبعي بالعكس خزرتلها بطريقة تخلّيها تتأكّد إنّي داخلة للبلاتو و مش باش نرحمها…. كلّمني مذيع البرنامج قبل الحلقة بليلة باش يقلّي راهي غدوة ضيفتنا و تناقشنا شويّة و كان عندي خيار بين إنّي نحضر للحلقة و بين إنّي نعتذر و للأمانة كان متفهّم جدّا لموقفي منها و قلّي ليك مطلق الحرّية
قلت كان ما حضرتش باش يقولو خافت منها و ما حبّتش تواجهها و كان حضرت و عملت إلّي في مخّي فمّا شكون باش يقول عاملين سيناريو
وهاي تعدّت السّنوات و كيما قلت وقتها أقسم بالله العليّ العظيم إنّو إلّي صار وقتها في البلاتو لاكان حدّ في بالو بيه لا مذيع البرنامج ولا أي شخص ليه علاقة بالبرنامج و النّاس الكلّ تفاجأت و لو ترجع الأيّام نعاود نعمل نفس الشّي
اليوم الطّفلة توقّفت و الكلّ ولّت أبطال و تسبّ فيها أنا بيني و بينها قضيّة تحكمت فيها بالحبس إبتدائيا ب3شهور بعد ما غلطت في حقّي و حقّ زوجي في أحد البرامج التّلفزيّة، وقامت هي بإستئناف الحكم والجلسة تعيّنت نهار 30 ماي وما نعرفش شنوّا ممكن يتحكم فيها “فقد أسقط حقّي إن حُكم لصالحي” ومن هنا لهاكا الوقت نحبّ نقول إنّي ضدّ الشّماتة فيها أو سبّانها أنا مشكلتي معاها كان فرضانها علينا في وسائل الإعلام و كيف خرجت من الإعلام ماعادش يهمّني الباقي حياتها و أمورها و أنستغرامها و بدنها وهي حرّة
هذا موقفي
أنا أواجه من يضاهيني أو يفوقني قوّة ولا أدوس على من أسقطته الأيّام و لو لبعض اللّحظات…
